Algortako San Inazioetako jai batzordeak dena prest dauka bihar, osteguna, ospakizunei hasiera emateko. Igandera bitartean, adin guztietarako hamaika jarduerez beteko dute herri erdigunea. Ohi bezala, hilaren 30ean egingo dute orain bi urte berreskuratutako jaitsiera tradizionalak. Antzina bezala, “Cuatro Caminos”-etik Ereaga hondartzara arteko bidea egingo dute dozenaka algortarrek, hareatza hondoan sandina-janaz, larrain-dantzaz eta Oihergi taldearekin dantzaldiaz gozatzeko. Abuztuaren 1eko txipiroi lehiaketari dagokionez, aurten 12. edizioa izango du. Parte hartu nahi dutenek ostiralean, hilak 30, edukiko dute izena emateko aukera. Horretarako, Ajuria tabernara gerturatu beharko dira, 17:00etatik 20:00etara bitartean. 10 euro ordainduta, lapikoa aurkeztu eta mahai bat eta sei aulki eskuratzeko aukera izango dute. Igandean bertan, anaitasun bazkaria ere izango da txosna gunean.
Argazkian, Algortako 15 koadrilek bat egin dute Algortako Gazte Asanbladaren adierazpenarekin / cc-by ukberri.net.
Urte honen hasieran, kalea herritar guztiona dela argi uzteko kanpaina abian hasi genuen, “Kalea herriarena da” lelopean. Kalean eginiko hiru jarduerengatik isun bana jaso genituela salatu nahi genuen. Herria aberastu eta bizitu egiten dituzten ekimenak zigortu egin zizkiguten, hala nola, umeentzako puzgarriak, truke azoka eta 500 pertsona baino gehiago batzen dituen Indabada herrikoia. Denborak aurrera egin du eta uda heldu zaigu. Hotzak eta euriak eguzkiari pasoa eman diote eta honekin batera jaiak gurekin ditugu. Eguraldia aldatu egin da baina ez udalaren jarrera. Udala bere jarrera inposatzailea geroz eta garbiago ari zaigu uzten. Ohikoa izan da udalak jai eredu herriko eta parte hartzaileekin bukatzeko izan duen jarrera, urtez urte Algortako zein Portu Zaharreko jai batzordeei eskumenak kenduz. Aurten ere, ez dira eskuz gurutzaturik gelditu: beti bezala zenbait kolektiboei txosnak ipintzeko bidea zaildu, lege berriak ipini eta eskubidea urratzen diete. Argazkian, Algortako 15 koadrilek bat egin dute Algortako Gazte Asanbladaren adierazpenarekin.
Komunikatu honen bitartez Algortako Gazte Asanbladak zera adierazi nahi du:
1.- Jai herrikoi, parte-hartzaile eta parekide batzuengatik lanean jarraituko dugula.
2.- Nahiz eta gure helburua txosna ipintzea ez den, guri dagokigun espazioaren alde egingo dugula eta jai batzordean urte guztian lanean ari diren kolektiboei gure babesa eskainiko diegula. Hau izan dela gure jarrera urtean zehar “kaleratuak” bezalako egitasmoetan parte hartzen.
3.- Jai batzordearen autonomia eskatzen dugula, jaiei dagozkien erabakietan. Besteak beste, bertan parte hartzen ez duten eta, beraz, helburu ekonomikoengatik soilik txosna ipintzen duten kolektiboek daukaten udalaren babesa ez dugulako ulertzen. Txosnetan banaketa arbitrariorik ez!
4.- Jaietan garrantzitsuena herria dela sinisten dugu eta horretarako herriaren parte-hartzea bultzatuko dugu. Jaiak herritik herriarentzat!
Beraz, kalearen erabilpena herriarena izan dadin, gure ekimenetara gonbidatzen zaituztegu, herritar, norbanako, koadrila eta edozein motatako kolektiboei.
Paella egunetan, herriko jaietan… kalean ikusiko gara.
Argazkian, iazko koadrila jaitsiera / cc-by ukberri.net.
Ostegun honetan abiatuko diren Algortako San Inazio jaiak direla eta neurri bereziak hartuko dituela jakinarazi du Metro Bilbao garraio enpresak. Telletxe kaleko geltokiko sarrera-irteera itxiko du “segurtasun kontuengatik” gauez, bihartik festak bukatu artean. Ostegun eta igandean 21:00etatik 06:00ak arte egongo da itxita, eta ostiral eta larunbatean, 21:00etatik 08:00ak arte. Bolueko sarrera-irteera ere, ostiral eta larunbatean itxita egongo da, 22:00etatik 03:00ak arte. Metro Bilbaok argitu duenez, trena hartzeko alternatibak Bidezabal eta Aiboako geltokiak izango dira. Argazkian, iazko koadrilen jaitsiera.
Getxoko Udalak ere hainbat neurri hartuko ditu. Hilaren 30ean eta 31n, su artifizialak izango diren egunetan, Ereagako moila itxi egingo dute trafikoarentzat, Kirol Portuko biribilgunearen eta Igeretxe ondokoaren artean, 22:30etik 23:30era. Gainera, jarriko duten segurtasun esparruan dauden pertsonak kanporatu egingo dituzte bertatik. Bestalde, barrakak abuztuaren 1era arte egongo dira Ereagan eta, hartara, eskumako errailean noranzko bikoitzeko bidea ipini dute, Terraza taberna eta igogailuaren tartean. Hilaren 29an ere neurri bereziak izango dira pregoia eta koadrilen jaitsiera direla eta. Horregatik, Telletxe, Algortako Etorbidea eta Mariandresena kaleetan trafikoa eten egingo dute, leku horietatik igaroko baitira koadrilak. Algortako Etorbidean, udaletxearen parean, autoak Foruak eta Euskal Herria kaleetarantz desbideratuko dituzte. Jaitsiera amaitutakoan ere jai eremuak itxita jarraituko du.
Uztailaren 30ean ere trafikoa eten egingo da, arratsaldeko 7etatik aurrera, jaitsiera tradizionala egiteko Cuatro Caminos-etik Ereagaraino, eta ondoren egingo den erromeriarako. Segizioa Basagoiti eEtorbideko erdira iritsitakoan zirkulazioa itxiko dute Ereagako moilan, Kirol Portuko biribilgunetik aurreran. Hartara, hondartzatik ateratzeko, auto guztiek Arriluzeko moilatik joan beharko dute.
San Inazio egunean, hilaren 31ean, Herri Krosa dela eta, 11:30etik 12:30era, Mariandresenako ezkerreko bidea eta Telletxe, Zodiacos taberna eta Algortako Etorbidearen arteko zatiak itxi egingo dituzte. Telletxen, Hirutasun kaleko bidegurutzean, autoak Aingeruaren Etorbiderantz desbideratuko dituzte.
Txirrindulari lasterketarako aparteko neurriak
Abuztuaren 1ean, txirrindulari lasterketa izango da 9:00etatik 13:30era bitartean. Hori dela eta, aparteko zirkulazio neurriak ezarriko dituzte. Izan ere, 7:45etik 14:00etara Makaletako Etorbidea norabide bakarrekoa izango da Plentzia-Bilbo noranzkoan, Bilbo-Plentzia noranzkoa debekatuta egongo delarik. Bilbotik Berangora joateko autobidetik datozen autoak Fadura-Iturgitxi atzealdetik desbideratuko dituzte. Algortatik Berangora sartzeko Simon Otxandategi etorbidetik egin beharko da; eta Kurtxera sartzeko Azkorritik. Zugatzarteko Etorbidea eta Ereaga eta Kirol Portuko sarbideak ere itxita egongo dira. Egun berean, hilaren 1ean alegia, trafikoa zuzenduko dute arratsaldeko 5etatik aurrera txikien jaitsiera dela eta, Telletxen eta Algortako Etorbidean.
Argazkian, iazko koadrila jaitsiera / cc-by ukberri.net.
Algortarrak,
Berriro ere saltoka eta algaraka gozatzeko lau egun eskaintzeko asmoz gatozkizue. Aurten, ordea, nabariagoak suertatu zaizkigu bidean aurkitu ohi ditugun harri koskorrak. Kalejira, dantzari, buruhandi, erraldoi eta koadrilak hezi, zanga eta hondeatzaileei iskin egiten ibili beharko dira 2010eko San Inazio jaietan. Luzerako daukagu, gainera! Bada, kalea altxatuta egotearen erantzukizuna gurea ez dela jakin badakigun arren, lehenik eta behin barkamena eskatu nahi dizuegu, horrek eragin ditzakeen eragozpenengatik.
Baina, auzotarrengan trabak eragiteaz gain, merkatari txiki ugariri galera izugarriak ekarri dizkiete inguratzen gaituzten obrek. Eurek sortu ez arren, ehunaka langabetu eta langile sufritzen ari diren krisia gehitu behar zaio guzti horri. Gauzak horrela, aurten inoiz baino ezinbestekoagoa egiten zaigu jaiak aurrera atera ahal izateko dirua ematen duten herriko ostalari, dendari eta eragileei eskerrik beroenak ematea. Eurak ere pairatzen ari dira krisialdi bortitza. Langabetu eta langile guztientzat bezala, beraientzat gure besarkadarik handiena.
Bestalde, lehen, gozamenerako ziren hainbat esparru, gune beltz bilakatu dira aurten obren eraginez. Emakume, jaiak, kalea eta gaua zureak dira! Eraso sexistak ekiditea guztion ardura delako, horien aurrean erantzun!
Bitartean, gure elkartasuna eta babesa adierazi nahi dizkiegu Euskal Herri osoan jai herrikoien alde lanean diharduten eragile guztiei. Herri-jaien mugimendua osatzen dugun aldetik, ereduaren izatea eta baliotasuna berresteaz bat, haren kontrako erasoak ere salatu nahi ditugu.
Azkenik, ez ditugu ahaztu nahi San Inazio jaietan gure artean egon ezin izango diren algortarrak.
Jai herrikoi, parte-hartzaile, parekide eta euskaldunen alde!
Gora Algortako San Inazioak!
UZTAILAK 29 – OSTEGUNA
18:30 Pregoiaren irakurketa 5 AXOLA taldearen eskutik (iazko koadrila txapelketaren irabazleak), ikurrinari omenaldia, txupinazoa 50.urteurrena ospatzen ari den BIDEBITARTE TXOKOAren eskutik eta traka, Telletxen.
19:00 Koadrilen Jaitsiera (koadrilen txapelketako 1go proba), Telletxetik
20:00 Samasiku fanfarrea herrian zehar.
20:00 Sardina jana (Jaio Berria taberna aurrean, lehengo Salem taberna).
20:30 Kalejira herrian zehar, txosna gunera.
20:30 X. Jota eta Arin-arin Txapelketa, Teilagorrin.
20:30 Kontzertua, jai giroa eta bildots errea Mamarro eta Ereatxu tabernen artean.
21:15 Bertsolariak: Mikel Mendizabal, Manolo Arozena, Gregorio Larrañaga “Mañukorta” eta Anjel Mari Peñagarikano. Gaijartzailea: Xabi Paia. (Kasino)
22:00 Haurrentzako zinema, Teilagorrin.
22:00 Suzko zezena Kasino plazan, Algortako Etorbidean zehar.
23:00 Kontzertuak:
Telletxe: Erasoka; Solte eta Ukabilkada.
Kasino: Duo Deno.
UZTAILAK 30 – OSTIRALA / GAZTE EGUNA
9:00 Diana eta kalejira herrian zehar.
11:00 Umeentzako puzgarriak: Gaztelua, Txirrista eta Pista Amerikarra; eta Ludoteka egun guztian zehar (Bihotz Alai plaza).
11:00 Gazte eguna (Telletxe). Gazteentzako tortilla txapelketa irekia (izen-ematea) (koadrilen txapelketako 2. proba).
12:00 Igela eta tiragoma txapelketa (Telletxe)
12:30 Patxin eta Potxin pailazoen ikuskizuna, Bihotz Alai plazan.
13:00 Bertsolariak: Amets Arzalluz, Aitor Sarriegi, Etxahun Lekue eta Onintza Enbeita. Gaijartzailea: Zuriñe Iarritu (Kasino).
14:00 Gazte Bazkaria (Telletxe).
17:00 Jai Herrikoien Aldeko Olinpiadak (2009an txosna ukatutako taldeen eskutik) eta amaitzean denak jeitsiera tradizionalera!
19:00 San Inazioetako Jaitsiera Tradizionala “Cuatro Caminos-etik” Bihotz Alai plazan bilduta denak, Ereaga hondartzako BARRAKETARAINO!. Herriko jantzia ipini, senide, laguna edo koadrila harrapatu eta denok betiko jaitsierara, saltona, kantuak biribilketaz, TURUTARRA, AREATXU eta TXOPOLIS fanfarreekin eta Ereagara heltzean sardina jana, larrain-dantza eta Oihergi taldearekin dantzaldia.
22:00 Suzko zezena (Isidrori omenaldia), Ereagan.
23:00 Su artifizialak: PIROTECNIA ZARAGOZANA (Zaragoza, Espainia), “Gau magikoa” ikuskizunarekin.
23:00 Kontzertuak:
Telletxe: Etsi Gabe, Sexty Sexers eta The Riff Truckers.
UZTAILAK 31 – LARUNBATA / SAN INAZIO!
9:00 Diana eta kalejira Algortako kaleetatik.
11:00 Umeentzako puzgarriak: Txirrista, Gaztelua eta Pista Amerikarra; eta Ludoteka egun guztian zehar, Bihotz Alai plazan.
11:00 Saharar herriarekin elkartasun ekitaldia: tea, henna, gastronomia… goiz osoan zehar, ATFAL taldearen eskutik. Palestinar artisautza eta idazketa tailerra BILADI elkartearen eskutik (Bihotz Alai plaza).
11:30 XIV. Kantxa Kirol Moda Herri Krosa
11:30 Dantzari tadeen bilkura Kasune kalean.
12:00 Dantzari taldeen kalejira herrian zehar: Kasune, Sarrikobaso, Salsidu, Villamonte eta Telletxe.
12:00 Meza nagusia eta ohorezko aurreskua (San Inazio).
12:30 Umeentzako Eriz Magoa, Bihotz Alai plazan.
12:30 Euskal dantzen agerraldia Telletxen.
13:00 Bertsolariak: Andoni Egaña, Jon Maia, Fredi Paia eta Jesus Mari Irazu.
Andoni Egaña eta Jon Maia egun osoan abestuko dute bertso-maratoiaren. Gaijartzailea: Peio Unzurrunzaga (Kasino).
14:00 Bertso bazkaria Andoni Egaña eta Jon Maia-rekin The Piper´s Irish Pub-en.
17:30 Nagusien luncha Algortako Kasinoan.
17:30 Umeentzako ikuskizuna Koblakariak taldearen eskutik (Bihotz Alai)
17:30 Erraldoi eta buruandien konpartsen bilkura Kasunen: Barakaldoko Laguntasuna Konpartsa eta Getxoko Buruandi eta Erraldoien Konpartsa (Agurra).
18:00 Nagusien dantzaldia TRIO MENTA taldearekin, Kasino plazan
18:00 / 19:00 Eneko Caballero XII. Futbito txapelketako final erdiak.
18:00 Konpartsen kalejira herrian zehar: Kasune, Sarrikobaso, Algortako Etorbidea, Kasino (erraldoien lehenengo dantzaldia), Basagoiti, Algortako Etorbidea, Mariandresena, Telletxe (erraldoien bigarren dantzaldia), Telletxe, La Cadena (azken dantzaldia) Sarrikobaso eta Illeta kalean bukaera.
18:00 Koadrilentzako Herri Kirolak (koadrilen txapelketako 3.proba).
19:00 Umeentzako bitsa festa (Bihotz Alai).
19:00 Bertso poteoa herrian zehar Andoni Egaña eta Jon Maiarekin.
20:00 Sardina jana (Jaio Berria taberna aurrean, lehengo Salem taberna)
20:30 Larraindantza
20:30 Kontzertuak eta jai giroa Mamarro eta Ereatxu tabernen artean.
22:00 Haurrentzako zinema (Teilagorri)
22:00 Suzko zezena Kasino plazan, Algortako Etorbidean zehar.
23:00 Su artifizialak: PIROTECNIA VALECEA-PIR, SL Berantevilla (Araba, Euskal Herria).
23:00 Kontzertuak:
Telletxe: Kaleko Orroak, Damba eta Kaotiko.
Kasino: DJ “Te quiero como amigo”.
ABUZTUAK 1 – IGANDEA / TXIPIAK + UMEEN EGUNA
8:30 Txipiroi lehiaketa Bihotz Alai plazan.
9:00 Iñaki Deunaren 65. nazioarteko elite mailako txirrindularitza zirkuitoa.
9:00 Diana eta Kalejira Algortako kaleetatik
11:00 Umeentzako jolasak, puzgarriak(Gaztelua eta Pista Amerikarra), ludoteka, umeentzako tailerrak: herri kirolak, plastikozko mozorro tailerra, aurpegiak margoztu… (Telletxe)
11:00 Umeentzako txalaparta tailerra UKTEST elkartearen eskutik (Telletxe).
11:30 Estropada: Algortako Portuzarra VII. Ikurriña.
12:00 Trikitilariak Algortako kaleetatik.
12:00 “Sasi Guztien Gainetik”, Euskal Mitologia ikuskizuna Basagoiti Etorbidean zehar.
13:00 Koadrilen aktuazioa (koadrilen txapelketako 4. proba).
13:30 Bertsolariak: Sustrai Colina, Julio Soto, Igor Elortza eta Iñaki Zelaia. Gaijartzailea: Unai Elizasu (Kasino).
13:30 Txipiroi txapelketaren lapikoen aurkezpena (Bihotz Alai).
14:00 Anaitasun bazkaria (txosna gunean).
17:00 Umeen jaitsiera Turutarra fanfarrearekin Telletxetik abiatuta, herrian zehar, Kasino plazaraino.
17:30 Txipiroi txapelketaren sari banaketa (Bihotz Alai).
17:30 Herri Kirolak: Aizkolarien Bizkaiko Irekia eta Bizkaiko Ingude-altxatze Txapelketa. (Telletxe).
18:00 Buruhandiak herrian zehar.
18:00 Eneko Caballero XII. Futbito txapelketako 3. eta 4. postuak.
18:00 Umeentzako txokolatada eta Diskofesta Kasino plazan eta amaitzean umeentzako suzuzko zezena.
19:00 Eneko Caballero XII. Futbito txapelketako finala.
19:30 XI. Erromeria tradizonala trikitilariekin (Teilagorri).
20:00 Sardina jana (Jaio Berria taberna aurrean, lehengo Salem taberna).
21:00 Dantza Plaza Erdizka Lauetan taldearekin, Telletxen
22:00 Suzko zezena Kasinon, Algortako Etorbidean zehar.
23:00 Sari banaketa Telletxen
24:00 Erromeria MIKEL HATS taldearekin, Telletxen.
Jaitsi egitaraua PDF formatuan:
Kaskagorri eta Txori Barrote konpartsei Bilboko Udalak jarritako zigorra dela eta, Aste Nagusian 24 orduko plantoa egingo dutela iragarri zuen herenegun Bilboko Konpartsak taldeak. Egun horretan ez dira txosnak irekiko eta konpartsek antolatutako egitaraua ere bertan behera geratuko da. Eitb.com-ek zabaldutakoaren arabera, protesta egun hori asteazkenean (abuztuak 25) izango da. Egun hori plantoaren arrazoiak azaltzeko baliatuko dute. Horrez gain, jaietan konpartsen parte-hartzea eta lana zein garrantzitsua den eta Aste Nagusia txosna barik zer den agerian geratzea nahi dute. Gauzak horrela, Algortako San Inazioetako Jai Batzordeak elkartasuna adierazi nahi die Kaskagorri, Txori Barrote eta Bilboko konpartsa guztiei. Horretaz gain, planto hori babestera eta herrikide, lagun eta senideei horren berri ematera deitu nahi ditugu algortar guztiak.
Gora jai herrikoiak!
